GENERAL SANTOS CITY – Giangkon usab P/Supt. Teody Condesa, tigpamaba sa Sarangani Police Provincial Office, nga nagpanaog usab ug direktiba si Sarangani Police Director Sr. Supt. Abul Kyr Macalangcom, nga ang kinsa mang pulis sa probinsya nga masayran nga konektado o may kalambigitan sa KAPA o Kabus Padatoon, ang mag-atubang sa kasong administratibo.
Gumikan kini sa mga kamanduan ug advisory nga gipagawas sa mga concerned agencies batok sa KAPA ug pagbutang ug salapi o investments sa nahisgutang investment scheme.
Kahibaluan nga hugot ang pahimangno ni PNP chief PDGen. Oscar Albayalde ngadto sa mga pulis nga nalambigit sa mga investments scam sama sa KAPA, kung asa gipasalig niini nga dili siya magduha-duha nga palagputon sa serbisyo ang mga pulis nga nalambigit sa susamang pagpangilad.
Hinuon, sa karon wala matud pa silay nasayran nga Sarangani police nga miapil o konektado sa KAPA. Dungan niini, gipahimangnuan usab ni Condesa ang mga kaubanang pulis nga himuon lamang ang tama.
