GENERAL SNATOS CITY – Gipangunahan ni Police Chief Supt. Eliseo Rasco, Regional Director sa Police Regional Office 12 ang pagbutang ug sticker sa Oplan Clear Rider sa mukabat sa 100 ka mga motorsiklo nga may kumpletong papeles ug rekositos.
Gilangkuban kini sa mga miyembro sa mga grupo sa riders sama sa Cymphil ug Karancho, kung asa ang mga nahisgutan ang mamahimong dugang nga force multipliers nga makaabag sa mga otoridad sa pagbantay sa seguridad sa palibot ug pagsumpo sa krimen.
Mitambong usab sa aktibidad si PNP city director Senior Supt. Raul Supiter, labaw sa General Santos City Police Office.
Matud ni Gen. Rasco, gilusad mismo ni Police Director General Oscar Albayalde kaniadtong Agosto 1, sa tumong nga mas mabantayan ang seguridad sa katawhan batok sa krimenalidad.
Dinhi sa siyudad, galaum matud pa si Gen. Rasco nga makatabang usab ang nahisgutang mga clean riders sa pagsumpo sa problema karon sa siyudad may kalabutan sa sunud-sunod nga insidente sa pagpamusil nga gikalambigitan sa mga motorcycle-riding criminals.
Isip pagsugod sa maong lakang, kolektahon matud pa sa mga otoridad ang tanang data ug impormasyon sa tanang mga motorcycle riders ug owners sa tibuok rehiyon, aron may huptan sila nga record sa database, dayon isyuhan nila ug sticker nga clean rider.
