GENERAL SANTOS CITY – Mukabat sa 70 ka karton sa nagkalain-laing matang sa sigarilyo ang nakumpiska sa joint task group sa merkado publiko ning dakbayan.
Gipangunahan ni PNP City Director Sr. Supt. Raul Supiter nga gipatuman ang Search Warrant nga gipagawas ni RTC 35 Judge Oscar Noel Jr, kalabutan sa nagkatag nga peke nga sigarilyo dinhi sa dakbayan.
Kuyog sa kapulisan ang mga sakop sa Bureau of Customs lakip ang representante sa usa ka kompanya sa sigarilyo .
Gibutyag ni Bureau of Custom Port Collector Angelito Anggulto nga gitawagan lamang sila ni Director Supiter aron mukuyog sa operisyon.
Nahibaw-an nga mga bag-ong brand sa sigarilyo ang nakuha sa raiding team nga gilayon usab gidala sa Bureau of Custom samtang ginasusi ang pagsulod sa nahisgutang produkto aron masuta kung nagbayad ug ensakto sa buhis.
Kahinumduman nga sa maiging adlaw gikompiska usab sa taga Fatima Police station ang daghang karton sa sigarilyo nga gidiskarga sa usa ka sakyanan.
