GENERAL SANTOS CITY -Nagpatabang karon sa PNP Anti-Cybercrime Group ang usa ka babaye human gipakatag sa social media ang iyang mga hubo nga litrato ug sa iyang pribadong bahin sa lawas.
Una niini, matud sa reklamante nga si Alyas Jane, taga-Polomolok, nagsugod ang tanan human siya nakiglambigit sa usa ka lalaki nga matud pa adunahan ug empleyado sa COA sa Koronadal, nga nailhan niya nga Michael Jacalan.
Nagkinahanglan matud siya ug salapi kaniadtong tungura alang sa usa ka project sa tulunghaan, hinungdan nga napugos siya nga magpakuha ug hubo nga litarto bugti sa kantidad nga usa ka libo ka pesos.
Apan human sa pipila nila ka panagkita matag higayon nga magkinahanglan siya ug salapi, nasuko matud pa kini kaniya human nga dili sila musugot nga muuban sa lalaki ug overnight.
Giakusahan usab matud pa siya sa maong lalaki nga gikuha ang iyang mahalon nga relo ug mga cellphone, butang nga hugtanon niyang gipanghimakak.
Usa ka adlaw, kalit na lamang matud pang may nag-private message kaniya nga nagpangalan ug Philip Dela Cruz, nga nagkanayon nga naa kaniya ang mga hubo nga litrato ni Alyas Jane, nga nasundan pa ug pipila ka laing mga tawo.
Sumala pa nga gipasagdan na lamang matud pa niya ang tanan bisan ug daw sa naguba na iyang dungog. Gikabutyag nga nagbahad kaniya ang nahisgutan nga patyon ang iyang uyab kon mag-apil-apil.
Apan kaniadtong Hulyo 1, natingala na lamang matud pa sila dihang kalit nga gidakop ang iyang kapuyo sa usa ka buy-bust, human nakuhaan ug marijuana.
Hugtanong gihingusgan ni Alyas Jane nga inosente ang iyang uyab, kung asa tulo ka higayon matud pang gibalik-balik ug ukay ang ilang balay una gihan-ay ang mga ebidensya kuno nga nakita sa ilang balay nga linukot nga newspaper nga may unod nga marijuana ug P100 nga cash, nga dili matud pa ilaha.
Wala usab matud pay tarong nga dokumento nga gipakita kaniya sa kapulisan dihang gisulod ang ilang panimalay.
Sa karon, nanawagan si Alyas Jane ngadto kang Michael Jacalan nga undangon na ang gihimo kanila sa iyang uyab, apil na ang pagpakatag sa iyang hubo nga litrato.
Gitugyan na lamang usab matud pa nila sa Diyos ang ilang nadangatan karon, apil na ang suspek.
Samtang, gahilak usab nga gihingusgan sa inahan sa hinigugma ni Alyas Jane nga inosente ang iyang anak, ug walay kamatuuran nga gagamitan ug marijuana.
Ug gani, matud ni Ginang Katherine, imposible nga positibo sa iligal nga droga ang iyang anak gumikan kaniadtong June 27, nagdonate matud pa kini ug dugo sa usa ka blood-letting activity.
Hinungdan nga sa karon, hustisya ang iyang singgit sa nadangatan sa anak nga naguba matud pa ang kinabuhi karon nga nabilanggo.
