GENERAL SANTOS CITY – Gisiguro sa Department of Labor and Employment nga musunod sa unsa mang desisyon nga ipakanaug may kalaotan sa mga kompanyang nalakip sa listahan nga misupak sa patakaran saa buhatan kabahin sa labor-only contracting.
Sa pakighinabi sa Bombo Radyo, gibutyag ni DOLE 12 Regional Director Sisinio B. Cano, gipadalhan na sa ilang buhatan og compliance order ang unom ka kompanya nga ania sa Socsargen nga lakip sa listahan sa 20 gikan sa 3,000 kompanya nga misupak.
Gibutyag ni Dir. Cano, ugaling magpagawas na og pinal nga desisyon ang DOLE National Office sa apela sa mga naasoyng kompanya, gilayon nilang ipatuman ang unsa mang desisyon nga una himuong regular ang mga apektadong trabahante.
Lakip niini ang DOLE Philippines sa Cannery Polomolok, South Cotabato kung asa mukabat sa 10,521 ang apektadong trabahante, General Tuna Corporation sa Brgy Tambler,Gensan nga may 5,216 trabahante, KCC Property Holdings Incorporated sa Brgy. Lagao Gensan nga may 1,802 trabahante, Sumifru Philippines Corporation sa Poblacion, T’boli nga may 1,687 trabahante, Dolefil Upper Valley Operations sa Surallah, South Cotabato nga may 1,183 trabahante og DOLE-Stanfilco sa Crossing Rubber Tupi South Cotabato nga adunay 1,131 apektadong trabahante.
Samtang, gihingusgan ni DOLE 12 Regional Director Sisinio B. Cano nga dili mamahimong tangtangon ang mga apektadong trabahante human nga nakadawat og compliance order ang ilang kompanya tungod sa pagpatuman ug labor-only contracting.
Matud pa niini, pinal nga desisyon sa DOLE ang mahinongdanon apan mintras may apela pa ang mga naasoy nga kompanya, dili pa usab sila makahimo og aksyon.
Sa pamahayag pa sa nasampit, unsa man ang ksamtangang ‘work arrangement’ tali sa kompanya og sa mga empleyado ang magpabilin samtang wala pa naresolba ang isyu.
Apan ugaling may pinal na nga desisyon, gilayon usab nilang padalhan ug mensahe ang mga kompanya nga ipatuman ang pag-regular sa ilang mga trabahante.
