GENERAL SANTOS CITY – May mga lead ug anggulo nang ginahuptan ug ginatutukan ang mga otoridad may kalabutan sa managlaing pagpamusil dinhi sa dakbayan.
Base kini sa pakighinabi sa Bombo Radyo kung asa gibutyag ni P/S/Insp. Fernando Manuel, labaw sa Fatima Police Station, gihuptan na silang witness ug may natumbok na nga suspek sa pagpatay sa gikabutyag nga mga lider sa Sukarap sa Prk 20-A Brgy Fatima, kung asa ang mga biktima giilang sila si Jessie Asoque, 21-anyos, laborer, taga-Blk 8 Prk 2 nasampit nga barangay, ug si Joel Abapo, 21-anyos, taga-Prk Lote Brgy Calumpang.
Gikabutyag nga personal nga bangi ang nakita nilang motibo sa pagpusil-patay sa duruha nga noted nga mga lider sa mga sukarap, kung asa ang mga suspek ang gikan matud pa sa kaatbang nilang grupo sa mga batang sukarap.
Samtang, ang reklamo nga pagpangawat ang ginatan-aw nga anggulo ang mga imbestigador sa Makar Police Station, may kalabutan sa pagpusil-patay sa usa ka 17-anyos sulod sa usa ka bilyaran sa Prk 10 Phase 2, Mangga St. Lanton Apopong ning siyudad, miaging gabii.
Matud ni Police Chief Inspector Renato Salarda, hepe sa nasampit nga presinto, kanhi nang gireklamo sa barangay ang biktima nga si Rondel Varquez, taga Prk. 15 Lanton, Apopong, gumikan sa pagpangawat matud pa ug manok.
Hinuon, padayon pa sa pagpangalap ug dugang impormasyon ang kapulisan kalabot sa insidente
Kahibaluan nga usa sa gipatutukan sa lokal nga panggamhanan kang PNP City Director Senior Supt. Raul Supiter mao ang natala nga sunud-sunod nga pagpamusil sa siyudad.
