GENERAL SANTOS CITY- Hugtanong gipanghimakak ni Police Chief Inspector Nestor Maderse Jr., hepe sa Pendatun Police Station, nga may mga “lubog” nga pulis sa ilang presinto, o kadtong mga gabayad sa ilang opisyal aron tugtan nga dili mureport sa duty, inay ang ilang kauban.
Kini human sa gibutyag ni City Councilor Franklin Gacal Jr. sa pakighinabi sa Bombo Radyo, nga sa iyang nasayran, adunay tulo ka “lubog” nga pulis sa Police Station 1.
Apan gihingusgan ni Chief Insp. Maderse nga walay kamatuuran ang maong taho gumikan ga-report gayud sa trabaho ang tanan niyang sakop.
Hinuon, gibutyag sa nasampit nga opisyal nga basin ang mga intelligence operatives ang maoy ginatumbok ni Gacal nga lubog.
Kini gumikan usahay lamang gaadto sa ilang buhatan ang mga operatiba, partikular na kon may mga accomplishment lang, aron mapanalipdan ug makalikay nga ma-expose.
Dungan niini, gitambagani ni Maderse ang konsehal nga iberipika ang taho nga gihuptan, o kaha sutaon ang ilang presinto aron makita nag ga-report gayud sa ilang tagsa ka responsibilidad ug trabaho ang tanan nilang mga sakop nga gibanabanaang anaa sa 56 tanan, apil na ang mga non-uniformed personnel nila.
Kahinumduman nga human nga nag-courtesy call kagahapon sa Sangguniang Panglungsod si City PNP Director Senior Supt. Raul Supiter, nagpatawag siya ug emergency meeting sa tanang mga chief of police, human nahisgutan ang kalabot sa mga lubog nga pulis.
