GENERAL SANTOS CITY – Gisumite na sa kapulisan sa PNP Crime Laboratory ang mga empty shell sa caliber 45 pistol nga narekober sa crime scene atubang sa letchon house sa BUla Lagao road ning syudad alang sa ballistic examination.
Kini kalabot sa pagpamusil patay sa pulis nga Po1 Glen Alicarte, nga kanhi na-assign sa City Police Drug Enforcement Unit sa GSCPO og nagtrabaho na karon sa Camp Crame.
Kahibaluan alas 12:30 sa udto, gipusil patay sa riding in tandem suspects ang biktima dihang nag-abli na pultahan sa iyang Honda Fit.
Nasayran nga gikan nagkaon si Alicarte sa Jever lative Letchon Hauz kauban ang hinigugma ug unang mibaktas paingon sa kotse. Kini basi sa pahayag sa hinigugma ni Po1 Alicarte kay Po1 Melvin Lamanero sa Bula Police Station sa gihimong pagpangutana.
Sa pahayag usab sa nakasaksi, nagmotor siya paingon sa mall apan igo paghunong niya atubang sa letchon hauz tungod gitan-aw ang iyang kadena, nakit-an ang pagpusil sa riding in tandem suspect sa biktima.
Paspas nga mipalayo sa lugar ang mga suspek paliko sa Socsargen County Hospital samtang may laing motor siya nga nakit-an nga paspas nga mipadagan paliko sa San Pedro paingon sa Mateo Road apan wala makahibalo kung kauban sa mga suspects.
Sa pahayag sa ubang nakasaksi, ang backrider ang naka-mask samtang naka-helmet ang gunman.
Ang biktima ang nakaangkon og pinusilan sa ulo kapos sa agtang hinungdan sa kamatayon niini.
Gikabutyag nga si Po1 Alicarte ang gipanganlan sa narcolist ni Pang. Duterte kaniadto. Miabot matud pa kini sa GenSan gikan sa Kauluhan niadtong Marso 14 aron mutambong matud pa ug court hearing.
Samtang, padayon pa imbestigasyon og pagpangalap og dugang ebidensiya ang Lagao Police Station alang sa pag-ila sa mga suspek ug motibo kalabot sa ulahing pagpamusil patay sa ilang AOR nga gisundan sa pagpamusil sa Bula Lagao Road pipila ka minuto lamang ang nakalabay.
Giila ni PCInsp. Peter Penalgan Jr, hepe sa maong presinto ang biktima nga si Deelon Bansuan, 44, negosyante ug hollow block nga taga Prk. Masunurin, San Isidro ning syudad. Basi sa nakuhang impormasyon sa iyang sakop sa ubang customer, ang biktima kauban ang iyang asawa ang nangaon ug balbacua sa RGH Eatery sa Purok 6, NLSA Road Brgy. Lagao.
Dihang nakakaon na og pagsakay sa ilang sakyanan, gilayong giduolan sa wala maihing mga suspek og gipusil sa upat ka higayun sa riding in tandem suspects ang biktima nga anaa sa drivers seat.
Hinuon, wala maigo sa bala sa pusil ang asawa sa biktima.
Pagkakaron, gi-imbestigahan pa sa kapulisan kung konektado ang pagpusil patay kay Bansuan og Po1 Alicarte.
