GENERAL SANTOS CITY – All-set na ang security plan nga ipatuman alang ning adlawa, sa ipahigayon nga preliminary hearing and public consultation kalabot sa P8.7 billion Road Right of Way Scam dinhi sa dakbayan.
Matud ni Police Chief Inspector Ruelito Lumiguid, labaw sa Traffic Management Unit ning siyudad, kini human sa gipatawag nga conference ni P/S/Supt. Ruel Berango kauban ang tanang mga chief of police sa siyudad, alang sa ipatuman nga seguridad.
Nasayran nga si Sen. Manny Pacquiao una ang maoy manguna sa ipahigayong preliminary hearing and public consultation kalabot sa nasampit nga isyu. Sumala pa nga alang ning adlawa, nakatutok sila sa Sangguniang Panglungsod ug sa palibot niini.
Hinungdan nga magpatuman ug road closure sa Roxas Avenue atubangan sa Sangguniang Panglungsod ug kalsada atubangan sa City Hall lakip ang mga dalan.
Samtang, mas hugot nga seguridad ang ipatuman sa Marso 22, gumikan muabot ang uban pang mga senador, alang sa pormal nga pagdungog ug imbestigasyon, kalabot sa P8.7 billion Road Right of Way Scam, nga ipahigayon sa SP.
Ug gani, gawas sa hugot nga seguridad kung asa 700 ka mga personahe gikan sa PNP ug AFP ang magbantay sa seguridad, andam na usab ug nakataod na ang mga speakers ug monitors sa SP, alang sa nasampit nga pagdungog.
