GENSAN – Nagpabiling balhug sa selda sa Makar Police station ang suspek sa pagpusil sa iyang ig-agaw sa gina-ilugan nga luna sa Espina, Brgy Labangal ning siyudad.
Kahibaluan nga nadala sa ospital ang biktima nga si Noria Mudia human gipusil sa suspek og ig-agaw nga si Danny Mudia.
Sa pakighinabi sa Bombo Radyo, hugot ang depensa sa suspek nga igo lang nanalipod sa iyang kaugalingon sa posibleng mahitabo kaniya.
Namugos matud pa ug sulod sa iyang luna ang biktima ug mga kauban nga may dala nga mga sundang, hole digger ug mga pangoral.
Dihang gikompronta ang mga nahisgutan, ang usa pa niya ka ig-agaw nga kauban sa biktima niadtong tungura ang gitulod siya ug gi-aksyunan ug tigbas sa dalang sundang hinungdan nga iyang giunhan ug mibunlot siya ug caliber 45 pistol nga nagresulta nga naigo sa tiyan ang biktima.
Sa wala pa ang insidente, gitarong niya pagsulti ang biktima nga dili musulod sa ilang area apan wala siya tagda tungod ang rason sa biktima nga igo lang manglimpyo ug magtanum ug kahoy.
Apan depensa sa suspek nga magbutang ug koral ug ilugon sa biktima ang ilang area. Hinuon, gikautyag sa suspek nga andam siyang atubangon ang kaso.
Kahibaluan nga sa tribal chieftain sa Labangal unang nagsurender ang suspek una giturn-over sa Makar PNP. Gitutukan na karon sa kapuisan ang insidente nga gumikan sa bangi sa yuta.
