GENERAL SANTOS CITY – Padayong giimbestigahan sa San Isidro PNP ang kalabut sa kamatayon sa usa ka edaran human nga nakit-an ang patay nga lawas niini sa usa ka luna sa Blk 8, Salvani St. Valencia 1, Brgy. City Heights ning syudad.
Kagahapon, alas 8 sa buntag dihang nakaplagan sa nagpangalan og Rolito Palmera, 23, caretaker sa luna ang nagpangalan og Pedro Lamaste, 65 anyos nga caretaker usab sa luna nga wala nay kinabuhi.
Hinungdan nga gilayong nagreport sa kapulisan kung asa naabtang nagbuy-od ang lawas sa yuta og nakabsan na sa kinabuhi.
Dihang gisusi ang lawas, walay nakit-ang samad kay Lamaste nga timailhan nga gipatay og adunay natigayong pagsukol.
Pagsaysay ni palmera sa kapulisan, una nakit-ang patay na ang maong edaran nag-sige ug reklamo ang nasampit nga gasakit ang dughan samtang lango sa ilimnong makahubog.
Hinuon, ang San Isidro PNP ang padayong ga-imbestiga aron masayran kung unsa ang hinungdan sa kamatayon sa maong edaran kung diin ang patayng lawas ang anaa na sa punerarya.
