GENERAL SANTOS CITY – Dako ang kalipay ug pagpasalamat ni OIC City PNP director Ruel Berango sa gihatag nga 25 ka hand-held radio ni Sen. Manny Pacquiao sa kapulisan sa dakbayan.
Kahibaluan nga gipangunahan sa chief political affairs officer ni Sen. Pacquiao nga si Bren Evangelio ang pagtunol sa naasoy’ng mga radyo sa kapulisan ning siyudad.
Sumala pa nga dako gayud nga tabang ang nasampit nga mga radyo alang sa mga pulis nga anaa sa beat patrol hilabi na sa pagmonitor sa mga gakahitabo sa palibot, hilabi na panahon sa mga emerhensya.
Gumikan niini paspas matud pang marespondehan ang mga insidente.
Samtang, gikalipay usab ni S/Supt. Berango gumikan aprubado na matud pa ni Sen. Pacquiao ang ilang request nga pagmuntar ug one-stop shop alang sa tanang mga clearances sama sa police, NBI, HPG, permits, ug uban pa, aron mas dali ug sayon alang sa mga aplikante.
Ug gani, naka-schedule na matud pa ang funding, kung asa posibleng sunod tuig masugdan na ang pagpatukod niini.
