GENERAL SANTOS CITY – Dasigon ni Presidential Communications Office Secretary Martin Andanar nga muatubang ngadto sa media si Col. Marvin Marcos.
Matud pa ni Andanar, natural lamang nga mapangutan-an si Supt. Marcos sa unsa mang isyu ilabina nga public servant ang nasampit.
Angayan lamang nga masayran sa mga katawhan sa rehiyon dose(SOCSKSARGEN) kon unsa ang mga plano ni Supt. Marcos isip OIC sa CIDG-12.
Kon siya ang pangutan-on, gusto gayud niyang dasigon ang kontrobersyal nga si Supt. Marcos nga muatubang sa media.
Samtang gidepensahan ni Andanar si Pangulong Rodrigo Duterte sa gilayong pagpabalik kay Col. Marcos sa serbisyo luyo sa pagkalambigit sa pagpatay kay kanhing Albuera, Leyte Mayor Rolando Espinosa Sr sa miaging tuig.
Matud si Andanar, ang desisyon sa Pangulo ang nakabase sa Legal Team, DOJ og PNP.
Aron mawagtang ang pagduda sa katawhan, tan-awon kon unsa ang matang sa pagserbisyo ni Supt. Marcos nga maoy mas mahinongdanon kaysa pagbantay sa mga kontrobersiyang gikalambigitan sa opisyal.
