GENERAL SANTOS CITY – Blangko pa ang kapulisan kung unsa ang motibo sa pagpamusil sa Barangay Kagawad sa Lapu, Polomolok South Cotabato.
Hinuon gibutyag ni Police Sr. Insp. Hernan Gabat sa Polomolok Municipal Police Station, dili pa man ma-establisar apan duha ka anggulo ang ilang gitutukan sa pagkakaron nga posibleng may kalabotan sa iyang trabaho o personal grudge ang hinungdan sa pagpusil patay kay Norman Nilong, 46 anyos.
Gibutyag ni Gabat, ipadayon ning adlawa ang pagkalap og testigo og mga ebidensiya ingon man ang pakig-istorya sa kabanay sa biktima alang sa imbestigasyon.
Gikadugang sa opsiyal nga gi-establisar karon kung si Kagawad Nilong ba o si Kapitan Abdullah Nilong ang target sa mga suspek.
Sa inisyal nga imbestigasyon, gipusil ang biktima samtang anaa sa cottage og kaistorya ang Kapitan.
Paspas nga mipalayo sa crime scene ang duha ka lalaki sakay sa itum nga motorsiklo human nga gipusil sa makadaghang higayon ang biktima.
Gilayon usab nga gidala sa tambalanan si Kag. Nilong apan nahunusan kini sa kinabuhi human makaangkon ug daghang samad pinusilan sa lawas.
