GENERAL SANTOS CITY- Gilaumang karong adlawa kasuhan ug paglapas sa RA 9165 kon Comprehensive Dangerous Drugs Act of 2002 ang usa ka bigtime drug pusher ug iyang runner human masikop sa nagsunod nga anti-drug operations sa PDEA-12 sa Koronadal City, kaniadtong Sabado.
Kasamtangang balhug sa PDEA-12 Detention Facility dinhi sa dakbayan si Sennen Panelo Jr. Alias Romeo Romuar o Balong, 39 anyos, usa ka mekaniko ug bigtime pusher nga taga Purok Centro Dos, Barangay Morales, Koronadal City, ug si Mark Anthony Amihan, residente usab sa nasampit nga lugar.
Kahinumduman nga unang nasikop ang runner nga si Amihan sa gipahigayong buy-bust, human napalitan ug usa ka sachet sa shabu. Sunod nga ipahigayon ang search operation sa panimalay ni Panelo nga mao matud pay source ni Amihan.
Matud ni Kat Abad, tigpamaba sa PDEA-12, dul-an P375,000 nga kantidad sa shabu gikan sa posisyon ni Panelo, gawas pa sa mga drug paraphernalia.
Nasayran nga gihimo niining front ang iyang motorcycle repair shop sa pagbaligya ug iligal nga droga.
Kasong pagsupak sa Section 5 sa RA 9165 ang atubangon ni Amihan, samtang Section 11 ug Section 12 kang Panelo.
