Lalaki angol human nga natripan og gipusil sa barkada

GENERAL SANTOS CITY – Angol og nadala sa balay tambalanan ang usa ka lalaki human nga gipusil sa barkada tungod matud pa natripan lamang.

Nagpaalim pa sa Dr. Jorge P Royeca Hospital ang biktima nga si Oting Usman Bakaman, hamtong ang pangidaron nga taga Palimbang Sultan Kudarat. Gipusil ang nasampit alas-12:45 kaganihang sayo sa kaadlawon og naigo sa tuo nga bahin sa iyang paa.

Gibutyag nga kalit lamang gipusil ang biktima sa walay igong rason og gikaingong natripan lamang sa iyang barkada.

Nailhan lamang nga si Alias Kim Kirab ang responsable sa pagpamusil sa biktima gamit ang wala masuta nga matang sa pistola.

Sa pagkakaron, gipangita pa sa kapulisan ang suspek human nga gilayong misibat pagkahuman sa gihimong krimen.