GENERAL SANTOS CITY – Dili magduha-duha ang militar sa paggamit sa tanan nilang pwersa ug capabilities alang sa paggukod ug pagpulbos sa mga kampo sa rebeldeng New Peoples Army.
Kini ang gibutyag ni Lt. Daryl Cansancio, tigpamaba sa 73rd Infantry Batallion Philippine Army, human gimando ni Pangulong Rodrigo Duterte sa AFP ug PNP, human ang natigayong pagpang-ambush-patay sa upat ka mga pulis sa Bansalan, Davao Del Sur miaging adlaw.
Ug gani, nagsugod na matud pa sila sa mga lakang nga ilang gihimo, hilabi na sa ilang area of responsibility sa Davao Del Sur, Sarangani ug Davao Occidental.
Apan gipaniguro sa nasampit nga opisyal nga ang ilang mga himuong lakang ug operasyon ang magtamod sa international humanitarian law ug human rights.
Giangkon usab ni Lt. Cansancio nga base sa ilang monitoring, aduna gihapoy mga rebelde sa ilang AOR nga gapahigayon ug mga extortion.
Apan nagbahad kini nga muabot ra gihapon ang panahon nga mag-abutay ra gihapon ang ilang pwersa, ug gipaniguro nga mas kusog gayud ang pwersa sa kasundaluhan itandi sa mga rebelde.
Samtang, gisaway usab ni Lt. Cansancio ang mga militanteng grupo nga kaniadto gasinggit ug human rights alang sa mga rebelde nga gipangdakop, gumikan naghilum-hilom hinuon karon nga mga pulis ang gipangpatay sa mga rebelde.
