GENERAL SANTOS CITY- Gilubong na ang usa sa upat ka pulis nga napatay human gibanhigan sa mga rebeldeng New Peoples Army sa Brgy Sibayan Bansalan Davao Del Sur kagahapong adlawa.
Kini ang gibutyag ni PO2 Ramsey Palma, desk officer sa Bansalan Municipal Police Station, sa pakighinabi sa Bombo Radyo.
Matud pa nga subay sa tinuohang Islam, gilaying gipalubong sa iyang pamilya ang patay’ng lawas ni PO1 Saro Mangutara.
Samtang ang lain pang tulo ka pulos nga namatay nga mao silang Po1 Rolly Benelayo, PO1 Joe Narvaza nga taga-Kidapawan City, ug PO3 Jayden May Rabor sa SOCO-Digos City, ang kasamtangan pang naa sa lokal nga punerarya ug gikatakdang kuhaon sa ilang tagsa ka mga pamilya.
Gikabutyag nga tadtad sa bala ang mga biktima nga kasamtangang giimbestigahan sa mga otoridad, samtang nagpadayon pa ang all-out hot puruit operation sa militar katambayayong ang PNP aron gukdon ang mga rebeldeng NPA, hilabi na ang mga responsable sa nahisgutang pagpamanhig sa mga pulis.
