GENERAL SANTOS CITY- Padayong giimbestigahan sa Traffic Management Unit ang natigayong karambola sa upat ka sakyanan sa National Highway Brgy. Apopong ning dakbayan, pasado alas-7:00 kaganiha sa buntag.
Hinuon, minor injuries ug mga samad lamang ang naangkon sa pipila ka driver tungod sa nasampit nga aksidente sa dalan nga gikalambigitan sa usa ka Isuzo MUX ug Strada ug Honda Fit ug tricycle.
Matud kang PO3 James Esteban, gikan sa Polomolok paingon sa GenSan ang Isuzo MUX ug Strada, samtang ang Honda Fit ug tricycle ang maoy anaa sa pikas lane pabor sa direksyon pa-Polomolok.
Sa inisyal nga imbestigasyon, misulay ug overtake ang MUX sa Strada kung asa naalanganin hinungdan nga mibalik, apan nasanghiran niini ang Strada hinungdan nga mituyok ug naadto sa pikas lane ug nabangga ang Honda Fit nga nalagpot usab paingon sa gasunod nga tricycle.
Gilayong gidala sa balay-tambalanan ang mga nalambigit nga driver aron ipasuta ang mga naangkon nilang gagmay’ng samad ug gasgas sa kalawasan.
Sa pagkakaron gisuta pa kon kinsa ang maoy may sala sa nahisgutang pagkarambola sa mga sakyanan.
