GENERAL SANTOS CITY – Giangkon ni City Councilor Vandyke Congson nga medyo nausab ang iyang panglantaw sa dealth penalty kon silot-kamatayon.
Kini luyo nga kaniadto ug base sa iyang moral nga pagtuo, supak siya nga subling buhion ang naasoy’ng matang sa silot.
Matud pa nga base sa iyang gihimong research ug pagtuon, dili dali-dali nga makapahamtang ug silot-kamatayon, hilabi na kon matumbok nga dili heinous kon mangilngig ang usa ka krimen nga nahimo, ug dili usab sayon ang pag-establisar niini gumikan muagi pa sa due process ug hugot nga pagtuki.
Hinungdan nga bisan ug supak matud pa sa death penalty, apan kon kon mao matud pa kini ang mahimong rason aron mahadlok ang mga kriminal sa paghimo ug salaod, walay dautan kon kini ipatuman.
Dugang pa ni Kag. Congson nga sagad sa rason nganong daghan ang supak niini gumikan kanunay’ng gilantaw ang katungod sa suspek.
Apan human sa iyang pagtuki-tuki ug pagtuon, nakaamgo matud pa siya nga mahinungdanon ug angayang huna-hunaon usab ang katungod sa nahimong biktima.
