GENERAL SANTOS CITY – Mukabat sa P12-P15 million ang damyos sa ilang produkto sa pipila ka oras nga pagbabag sa mga sakop ni Rodrigo Olarte, kinsa usa sa niangkon sa 973 ektarya sa Hacienda Espina sa Brgy. Labangal, GenSan.
Kini ang giangkon ni Ariel Sarayno ang tigdumala sa Tenpoint Manufacturing Corporation human nagbutang ug koral atubang sa ilang planta hinungdan nga nahadlok ang mga trabahante pagsulod sa trabaho.
Ang pinakadako nga danyos matud pa ang wala pagpasulod sa mga pinalit nga isda gikan sa GenSan Fishport Complex ning syudad.
Wala usab makarga sa barko ang usa ka shipment nga produktong Tuna paingon sa nasud Japan human gisamok sa mga Olarte ang ilang operasyon.
Gipasalamatan sa kompanya ang gihimong aksyon sa syudad nga nagpagawas ug kamanduan aron gub-on ang koral nga gibutang sa mga Olarte atubang sa planta.
