GENERAL SANTOS CITY– Sugdan karong adlaw nga lunes Pebrero 27 ang pagsusi sa mga barangay, siyudad, munisipyo alang sa Gawad Kalasag Award 2017.
Matud kang DILG-South Cotabato OIC Provincial Director Aurora Andrea de Pedro nga tumong niini nga masukod ang kaandam sa mga LGU sa Disaster Risk Reduction and Management.
Una nga bisitahon ang munisipyo sa Tupi dayon sa Marso 1 ang Koronadal sa city category.
Gikadugang sa DILG nga kinahanglan nga makakuha ug 80% nga score aron makaangkon ug insentibo nga P20,000.00.
Marso 20 ang Banga ug pagka-ugma ang Polomolok nga sundan sa Surallah, Marso 23 sa T’boli ug Marso 24 sa Tantangan.
Sa Abril 3 usab sa Tampakan, Abril 4 sa Lake Sebu, Abril 5 sa Norala ug Abril 6 sa Santo Niño.
Dinhi basihan ang mahimong ‘Best Prepared Local DRRM’ sa Hulyo dungan sa pagsaulog sa National Disaster Consciousness Month.
Matud ni de Pedro nga ang mapili sa ‘Gawad Kalasag Regional Level’ makadawat ug P50,000, P40,000 ug P25,000 ang 1st, 2nd ug 3rd placer sa Best Prepared Municipal DRRM.
Samtang P50,000, P30,000 ug P15,000 usab ang ihatag sa ‘Best Prepared Barangay DRRM’ sa urban ug rural categories.
Nasuta nga mitagana ug P450,000 ang South Cotabato alang sa Gawad Kalasag.
