GENERAL SANTOS CITY – Desidido silang Brgy. City Heights Kag. Lourdes Gambalan ug bana nga si Johnny Gambalan, nga pasakaan ug kaso ang driver nga nani-on kanila ug pusil tungod lamang sa bangi sa trapiko.
Una niini, sa pagsaysay ni Kag. Gambalan, pauli na silay sakay sa puti nila nga multicab ug ginasubay ang Block 8 ug paliko na sa Aparente St., dihang adunay usa ka Isuzo D-Max ang nakigdungan ug midutdot kanila sa daplin.
Hinungdan nga nasanghiran ang ilang sakyanan.
Dayon nagsige matud pag busina ang naasoy’ng sakyanan hinungdan nga gipaningkamutan nilang mupadaplin na lamang una, dungan sa pagsenyas sa driver sa nasampit nga sakyanan aron muabante na.
Apan mihunong matud pa sa kilid nila ang naasoy’ng sakyanan, dayon mianog ang driver ug nani-on ug pusil ngadto kanila agi sa bintana sa ilang multicab, dungan sa pagpamalikas, una mihawa sa lugar.
Matud pa ni Kag. Gambalan nga hilabihan ang iyang kahadlok gumikan kon nakablit ang gihuptan nga pusil sa suspek, posibleng nakabsan sila sa kinabuhi sa iyang bana. Hinungdan nga midangop sila sa San Isidro Police Station ug gipatala ang nahitabo.
Gikatakda nilang ipasuta ang CCTV sa lugar, aron matumbok ang ilhanan sa suspek nga gituuhang nilang lango sa ilimnun.
Karong adlawa planong i-follow up sa magtiayon ang reklamo, hilabi na nga nakuha ang plate number sa sakyanan nga gimanehuan sa suspek nga mao ang RNW 746, kung asa gikabutyag nga nakita niini pinaagi sa bintana nga luyo nga naka-sibilyan nga sapot ang suspek, may nakita matud pa siya nga uniporme sa pulis, butang nga gikatakda pang iberipika.
Dungan niini, gipasalamatan ni Kag. Gambalan ang Bombo Radyo nga lakip sa mga miresponde kanila.
