Gipanggabas ang 91 ka mga pusil nga gisurender sa mga kanhi mga rebelde ug mga extremista nga grupo nga naglihok sa South Cotabato nga mibalik sa sakaban sa gobyerno.
Atul sa usa ka seremonya nga gipahigayon kagahapong adlawa sa Covered Court sa Camp General Paulino T. Santos sa Police Regional Office 12 nga gitambungan ni Brig General Arnold Ardiente, lakip ang representante sa Philippine Army, Philippine Navy ug mga dinapit bisita aron saksihan ang pagguba sa nagkalain laing kalibre sa armas.
Matud ni General Ardiente nga ang naasoy nga mga pusil ang gigamit kaniadto sa mga sakop sa rebelding grupo dihang aktibu pa sa kalihukan.
Gikadugang sa opisyal nga ang demilitarization ang programa sa gobyerno aron gub-on sa hingpit ang mga armas nga gisurender sa mga kanhi rebelde nga napailawom na sa Enhanced Comprehensive Local Integration Program kon E-CLIP.
