GENERAL SANTOS CITY – Mukabat sa 813 ka pulis tibuok rehiyon dose ang natakbuyan sa Coronavirus disease.
Matud kang P/LtCol. Maria Joyce Birrey, ang tigpamaba sa PRO-12, sa maong ihap 58 niini ang active cases, 752 ang nakarekober og unom ang COVID 19 related death.
Gibutyag sa nasampit nga opisyal nga mukabat sa 51 ang anaa sa quarantine facility og pito ang naa sa tambalanan.
Sa pamahayag ni Birrey, ang mga nagpositibo nga pulis ang kasagaran naa lang nagtrabaho sa lain-laing opisina sa police unit og nagtinakday og dili ang mgaa na-destino sa mga checkpoints.
Gidugang ni Birrey nga hugot ang direktiba Police Brigader General Michael John Dubria, Regional Director sa PRO-12 sa tanang sakop tibuok rehiyon sa pagsunod sa mga protocols batok sa Covid-19.
Aron mabatukan usab ang maong virus infection, ginapahigayon ang disinfections sa lain laing mga opisina samtang nagapadayon ang pagbakuna sa mga pulis alang sa ilang proteksyon samtang ginahimo ang ilang mandato isip tigpatuman sa mga balaud.
