GENERAL SANTOS CITY – Gidala na sa dakbayan sa Davao ang walo ka Chinese national nga nasikop nga sakay sa usa ka barge sa kadagatan nga sakop sa Brgy Pinol, Maitum, Sarangani Province.
Una niini, gibutyag sa Philippine Coast Guard-GenSan nga nakadawat sila ug report kaniadtong Abril 2 kalabot sa usa ka barge nga gisakyan sa nahisgutang mga langyaw kauban ang duha ka mga Pinoy.
Gisita sa mga otoridad ang mga nahisgutan ug gi-report sa Phil. Coast Guard, Phil. Navy, DENR, BFAR ug Bureau of Immigration and Deportation kung asa nasayran nga walay mga gihuptan nga dokumento.
Nasayran nga nagkutkot ang nahisgutang mga langyaw ug mga puthaw sa usa matud pa ka karaang barko sa nga Hapon gikan kaniadtong panahon pa sa World War II, nga naunlod sa maong bahin sa kadagatan, butang nga gikabalak-an sa mga otoridad nga madaot ang mga coral reefs.
Gikabutyag usab nga base sa records sa Coast Guard, una nang midunggo sa Maco Wharf sa Davao ang nahisgutang barge kaniadtong Marso ug midiretso sa may Sarangani Bay.
Samtang gidala na sa Davao ang walo ka mga langyaw alang sa pag-imbestiga, gipailawom usab sa imbestigasyon usab dinhi sa dakbayan ang duha ka mga Pinoy nga kauban sa mga nahisgutan.
