GENERAL SANTOS CITY – Nadugangan pa ang ihap sa kaso sa gituuhang measles nga natala sa Upper Suyan, Malapatan, Sarangani.
Sa pakighinabi sa Bombo Radyo, gibutyag ni Maribel Capilitan, nurse sa Municipal Health Office, nga walo na ka mga sitio sa maong barangay ang apektado sa tipdas, nga mao ang Sitio Mahayag, Upper Kyogam, Lino, Acasia, Siman, Upper Kihan, Tamayao, ug Landang.
Kahibaluan nga miabot na sa 18 ang ihap sa mga namatay tungod sa maong sakit sa nasampit nga lugar. Dose matud pa ang nadala sa ospital, kung asa unom na ang nakagawas base sa ilang record, ug gikatakdang mugawas ang laing unom nga nahibilin.
Apan bag-uhay lamang, laing pito matud pa ka mga indibidwal ang nadala sa Diagan Hospital tungod gihapon sa tipdas.
Hinungdan nga gikatakdang mubalik ning adlawa ang medical team sa LGU-Malapatan, apil gikan sa provincial goverment, Red Cross, ug ubang concerned agencies, ngadto sa mga apektadong sitio sa Brgy Upper Suyan.
Sumala pa nga magpabilin ang medical team sa lugar sulod sa tulo ka adlaw, aron magpahigayon ug mass vaccination kontra measles, ug mukuha ug blood samples, aron makontrola ang pagkatag sa maong sakit.
Ug gani, miabot na matud pa ang mga bag-ong supplies nga ilang gamiton.
Nasayran nga sa unang pag-adto sa medical team sa lugar miaging adlaw, dul-an 600 matud pa ang nabakunahan nga mga indibidwal batok sa measles.
Hinungdan nga nanawagan ang taga-Malapatan MHO ngadto sa katawhan nga gilayong muadto kon may ipahigayon nga scheduled vaccination aron mahimong luwas sa maong sakit.
