Nisaka na ngadto sa walo ang ihap sa mga kumpirmadong kaso sa mpox sa Bangsamoro Autonomous Region in Muslim Mindanao (BARMM).
Kini human sa laing tulo ka mga tawo ang nagpositibo sa maong sakit sa Cotabato City.
Matod sa city health officer nga si Dr. Harris Ali, lakip sa tulo ka bag-ong kaso mao ang 28-anyos nga babaye nga kasamtangang gitambalan, usa ka 72-anyos nga lolo, ug 4-anyos nga batang lalaki nga ubos sa home isolation.
Gi-report usab sa opisyal nga adunay 14 ka mga gidudahang kaso sa mpox nga gi-monitor karon sa ilang lungsod.
Kalabot niini, giawhag sa opisyal sa panglawas ang publiko nga magpatambal dayon sa mga health center o labing duol nga tambalanan kung makasinati sila og mga sintomas sa mpox sama sa hilanat, ubo, sakit sa lawas, labad sa ulo, ug uban pa.
Ang health minister sa BARMM nga si Dr. Kadil Sinolinding nagkanayon nga ang mpox usa ka sakit nga mapasa pinaagi sa skin to skin o close contact nga mahimong mapugngan pinaagi sa saktong hygiene ug safety measures sama sa paglikay sa close contact sa mga indibidwal nga nagpakita og sintomas sa mpox.
