Mibalik ang eruptive activity sa Bulkang Mayon human namatikdan ang pag-uswag sa Strombolian activity sa summit crater niini niadtong Martes sa gabii.
Sumala sa Philippine Institute of Volcanology and Seismology o PHIVOLCS, nagbuga ang bulkan og dagkong incandescent ballistic fragments o nagkahayag nga mga tipik sa bato gikan sa crater.
Padayon usab ang pag-agas sa lava sa Mi-isi ug Bonga Gullies samtang nagpabilin ang aktibidad sa bulkan.
Gipabilin sa PHIVOLCS ang Alert Level 3 sa Bulkang Mayon, nga nagpasabot nga anaa gihapon kini sa lebel sa nagpadayon nga peligro nga pag-erupt.
Gipahimangnoan ang publiko nga hugot nga gidili ang pagsulod sulod sa unom ka kilometro nga Permanent Danger Zone o PDZ tungod sa posibleng kalit nga pagbuto, paghulog sa mga bato, ug uban pang peligro nga mahimong ipahinabo sa bulkan.
