Pito ang kumpirmado nga patay human madisgrasya ang usa ka sakyanan nga gikan usa ka tourist spot sa Tupi, South Cotabato.
Basi sa inisyal nga report sakay sa usa ka L300 van ang usa ka pamilya nga mibisita sa Magsangyaw Land of Praise.
Pag-uli na matud pa ang mga biktima dihang nawad-an ug kontrol ang manibela sa sakyanan samtang naa sa palogsong nga bahin hinungdan nga nabangga sa punu-an sa kahoy.
Tungod sa kakusog sa pagkabunal nahulog sa bangin ang pipila ka sakay samtang adunay pipila nga nahibilin sa sulod sa sakyanan.
Nasuta nga nalagpot ang driver sa sakyanan nga mao lamang nahibilin nga buhi.
Gisulayan ug dala sa mga emergency responder ang pito ka biktima apan gideklara nga dead on arrival.
Giila sa Tupi Municipal Police Station ang mga biktima nga silang Annabelle Maglente, 52; Joan Maglente, 28; Joel Maglente; Duke Maglente; ug Ike Maglente, pulos residente sa Cagayan de Oro City.
Nasuta nga mibisita lamang sa ilang kabanay sa Polomolok South Cotabato ang mga biktima.
Duha ka mga minors nga taga Polomolok ang apil nga nahunusan sa kinabuhi ang pito ug walo ka tuig nga biktima.
Samtang giimbestigahan sa kapulisan ang driver nga si Oliver Maglente ang nag-inusara nga survivor sa panghitabo.
Nahitabo ang aksidente alas tres sa hapon sa Barangay Cebuano Tupi South Cotabato.
