Labing menos 64 ka mga tawo ang namatay ug 65 ang nawala human sa kusog nga ulan nga mihapak sa Mexico sa miaging semana, ang gobyerno miingon kaniadtong Lunes.
Ang mga pagbaha ug pagdahili sa yuta gipahinabo sa usa ka tropikal nga depresyon nga miigo sa mga bahin sa Gulf Coast ug sentral nga mga estado.
Si Presidente Claudia Sheinbaum, kinsa mibisita sa mga lugar nga gibahaan sa La Ceiba, miingon nga kapin sa 100,000 ka mga panimalay ang naapektuhan.
Matud usab ni Admiral Raymundo Morales sa Mexican Navy nga ang pagbaha tungod sa kombinasyon sa init ug bugnaw nga hangin sa mga suba nga nihubag na sa mga bulan nga ulan.
Ang mga estado sa Veracruz ug Hidalgo ang labing grabe nga naigo, nga adunay 29 ug 21 nga namatay, matag usa, samtang daghan pa ang nawala.
Gibanlas sa baha ang mga taytayan, mga dalan ug mga balay, ug napuno sa lapok ang kadalanan. Liboan ka mga kawani sa gobyerno ang gipakatap aron mobakwit, manglimpyo ug maghatud sa mga hinabang.
Nabalik na ang suplay sa kuryente sa kadaghanan sa mga apektadong lugar, samtang gitutokan karon sa mga otoridad ang pagpugong sa pagkuyanap sa mga sakit sama sa dengue tungod sa mga lamok sa nagpundo nga tubig.
