Gihisgutan sa impeachment trial ni Vice President Sara Duterte ang 51 ka rehistradong armas nga iya ug sa iyang bana nga si Atty. Manases “Mans” Carpio.
Sumala sa testimonya ni Police Major Joe Rickson Sangalang, Records Division Chief sa PNP Firearms and Explosives Office o FEO, adunay 22 ka armas nga nakarehistro kang VP Sara, samtang 29 naman ang nakarehistro kang Carpio. Lakip niini ang upat ka Class A light weapons nga adunay fully automatic function.
Gipresentar sa House prosecution panel ang mga rekord sa FEO isip kabahin sa ilang ebidensya kalabot sa alegasyon sa dili maipasabot nga bahandi o “unexplained wealth” ni VP Sara.
Base sa pagtaya sa PNP, mokabat sa kapin 7.2 milyon pesos ang kasamtangang bili sa merkado sa maong mga armas.
Apan giklaro sa depensa ug ni Presiding Officer Senador Francis “Chiz” Escudero nga ang maong kantidad gibase sa kasamtangang presyo sa merkado ug dili sa aktuwal nga kantidad nga gibayran sa magtiayon sa ilang pagpalit sa mga armas.
Tungod niini, gipamubo ni Escudero ang pagpresentar sa prosecution sa maong saksi, tungod kay ang datos nga gipakita wala pa igo aron direktang mapakita ang koneksyon sa mga armas ngadto sa alegasyon sa unexplained wealth nga nalambigit sa SALN ni VP Sara.
