Gikumpirma ni BOC Commissioner Ariel Nepomuceno nga anaa sa kustodiya sa Customs ang 30 ka mga luxury cars nga panag-iya sa mga Discaya.
Kahinumdoman nga kaniadtong miaging semana, gisugdan sila sa pagsikop ubos sa search warrant.
Sa press conference kagahapong adlawa, gibutyag ni Nepomuceno nga 8 sa mga sakyanan ang walay import-entry documents ug certificates of payments, nagpasabot nga wala silay mga dokumento nga makasulod sa nasod hinungdan nga makonsidera kini nga ‘smuggled’.
Samtang 7 niini bisan dunay import-entry documents apan walay certificates of payments hinungdan nga hatagan og 15 ka adlaw ang mga Discaya ug ang ilang mga consignee aron pamatud-an nga sakto ug dunay igong dokumento ang mga sakyanan.
Si Nepomuceno niingon nga kon dili paigo ang ilang pruweba, ipadayon nila ang pagluwat og Warrants of Seizure and Detention alang sa mga sakyanan.
Kalabot niini, nasuta sa ilang pagtuki nga kompleto na ang mga dokumento sa 14 ka mga luxury cars apan kinahanglan pa silang moagi sa Post-Assessment Clearance aron masiguro nga maayo ang pagsulod niini dinhi sa nasod.
Gitumbok usab ni Nepomuceno nga ang maong mga luxury cars nisulod gikan sa mga pantalan sa Batangas, Cebu, Manila ug Manila International Container Port.
