GENERAL SANTOS CITY – Mukabat sa 245 Locally Stranded Individual kon LSI ang naka-quarantine sa kasamtangan sa Centralized Isolation Facility sa Malungon Sarangani Province.
Matud pa kang Mayor Tessa Constantino, gimonitor ang kondisyon sa panglawas sa mga nasampit samtang anaa sa kwarantinas.
Gibutyag niini, ang munisipyo adunay duha ka municipal centralized isolation unit alang sa tanang LSI.
Aduna usay bulag nga isolation unit alang sa mga OFW og laing back-up nga isolation unit alang sa mga LSI gihapon nga dili na ma-ukopa sa duha ka centralized isolation unit.
Sa pamahayag ni Mayor Constantino, ang tagsa ka mga barangay usab sa munisipyo ang adunay kaugalingong isolation unit.
Ang Malungon adunay 26 covid-19 cases nga natala, apan ang 22 niini ang nakarekober na, samtang upat niini ang active cases.
Hinuon gibutyag ni Mayor Constantino nga anaa sa maayong kondisyon ang mga nasampit nga kasamtangan nga anaa sa treatment facility.
