Luwas nang nakatabok paingon sa Jordan ang 21 ka opisyal sa gobyerno nga na-stranded sa Israel taliwala sa nagkagrabeng tensyon tali sa Israel ug Iran.
Sumala sa Department of Foreign Affairs (DFA), sa maong grupo, 17 ang mitambong sa training sa agricultural technology sukad Hunyo 10 hangtod Hunyo 20.
Apil niini ang duha ka kongresista, siyam ka mayor, upat ka bise mayor, ug duha ka regional director.
Apil usab ang upat ka espesyalista gikan sa Department of Agriculture nga may kalabotan sa industriya sa gatasan.
Sumala sa DFA, aktibo nga nakig-coordinate ang Philippine Embassy sa Tel Aviv sa embahada sa Pilipinas sa Jordan ug sa mga awtoridad aron masiguro ang luwas nga pagtabok sa grupo.
Gisugat sila ni Philippine Ambassador Wilfredo Santos sa King Hussein Border diin gitagaan sila og ayuda, lakip na ang libre nga transit visa gikan sa gobyerno.
Gilauman sa DFA nga sa mosunod nga mga adlaw, makadawat usab ang embahada sa Jordan sa unang batch sa mga overseas Filipino workers (OFWs) nga kabahin sa evacuation efforts.
Sa laing bahin, sa usa ka interview, gibutyag ni Philippine Ambassador to Israel Aileen Mendiola-Rau nga mobalhin una ang grupo paingon sa Dubai sa wala pa sila mopauli sa Manila.
Padayon sa karon ang bayloanay ug opensiba tali sa Israel og Iran, nga nagbutang sa peligro sa mga sibilyan og langyaw nga anaa sa lugar sa kagubot.
