GENERAL SANTOS CITY – Gibanabanaang mukabat sa P300,000 ang natala nga damyos sa Bureau of Fire Protection-Gensan, human masunog ang mga bunk house sa Tambler Police Station kaganihang kaadlawon.
Nahitabo kini bandang alas- tres sa kaadlawon, duol sa karaan nga presinto, kung asa gibanabanaang mukabat sa kapin 20 ka bunk house ang naugdaw, duol matud pa sa kusina nila.
Ugdaw gayud ang nahisgutang mga bunk house gumikan gigama sa light materials, kung asa gawas sa mga gamit sa ilang mga sakop, naangin usab sa sunog ang usa ka Toyota Vios nga gipanag-iyahan ni PO3 Joseph Solivio.
Hinuon, wala matud pay tawo nga naangin sa sunog.
Sa pakighinabi sa Bombo Radyo kang Senior Fire Officer 1 Makakuna Tumambiling, gibutyag niini nga padayon ang gihimo nilang imbestigasyon, aron masayran kon unsa gayud ang hinungdan sa sunog.
