GENERAL SANTOS CITY – Nagmalampuson ang gipahigayong Search Warrant operation sa Alabel Municipal Police station kauban sa ubang unit sa kapulisan sa Sitio Ihan Datal Anggas, Alabel Sarangani Province nga nagresulta sa pagkaaresto sa duha ka target suspek.
Matud ni SP04 Israel Lantingan, chief investigator sa maong presinto ang maong operasyon pinasubay sa upat ka serach warrant kalabot sa pagsupak sa kasong RA 10591 kon possession of firearms and ammunition sa mga suspek.
Ang mga dinakpan nailhan nga silang Rodrigo Pendatun, 33 anyos, minyo, residente sa lugar ang nakuhaan og unom ka buhing bala og .45 caliber pistol samtang ang silingan nga si Sixto Tino, 38 anyos, minyo, ang nakuhaan og garrand rifle og siyam ka buhing bala og tulo ka magazine.
Sa pamahayag ni Spo4 Lantingan, basi sa mga nadawat nilang report sa mga silingan, gamugna og kahadlok ang mga dinakpan sa mga residente sa lugar gumikan sa pagdala -dala og pusil.
Nasuta usab nga mga supporters sa lawless elements sa lugar nga posibleng NPA silang Pendatun og Tino.
Samtang, target usab sa search warrant silang Venancio Moda og Ruben Pendatun kon asa usa niini ang nagnegatibo human nga walay narekober nga armas og bala sa pinuy-anan.
