2 ka bumbero patay human gipangpusil

Patay ang duha ka bumbero human sila gipangpusil samtang nagrespondi sa usa ka insidente sa Kootenai County sa Idaho.

Base sa imbestigasyon, adunay nadawat nga 911 call nga nagreport og sunog sa Canfield Mountain.

Pag-abot sa mga bumbero gikan sa Coeur d’Alene Fire Department, gipangpusil sila, nga miresulta sa kamatayon sa duha ka bumbero samtang usa pa nilang kauban ang nasamdan.

Human sa pipila ka oras, nadiskubre sa mga otoridad ang patay nga lawas sa 20-anyos nga suspetsado nga si Wess Roley.

Nakit-an ang suspek sa usa ka daplin sa bukid uban sa sniper rifle nga giingong gigamit niya sa pagpamusil.

Sa pagkakaron, padayon pa ang imbestigasyon sa mga otoridad aron masayran ang motibo sa maong pagpamusil.