ALABEL, SARANGANI- Nanawagan si Sarangani Gov. Steve Chongbian Solon ngadto sa tanang Sarangan, lakip mga taga-kasikbit lugar, nga makigduyog sa pagsaulog sa Sarangani sa Munato Festival, ug silver anniversary kon ika-25 ka tuig sa kamugnaan sa probinsya, kung asa ang sentro sa kasaulugan mao ang Sarangani Capitol.
Sumala pa nga karong adlawa, sa opening sa naasoy’ng kasaulugan, adunay ipahigayon nga Employees Got Talent, Sulong Kabataan Summit, ug ang Founder’s Night, kung asa magkatigom ug pasindunggan ang mga personalidad nga nanguna sa kagmugnaan sa Sarangani.
Samtang, ugma, Nobyembre 29, mamahimong highlight ang Pearl of Sarangani.
Magpadayon usab ang village museums ug matigayon ang Jesus Reigns concert pagka-Huwebes, Nobyembre 30.
Samtang pagka-Disyembre 1, giimbitahan ni Gov. Solon ang tanan gumikan may concert ang bandang Rivermaya, sulod gihapon sa capitol grounds.
Kalabot sa hisgutanan sa seguridad, gipasalig ni Gov. Solon nga hugot ang gipatuman nga pagbantay sa seguridad, kung asa kapin 300 ka mga security forces matud pa ang gi-deploy gikan sa kapulisan ug kasundaluhan ug uban pang security forces gikan sa Gensan ug Sarangani, aron masiguro nga mamahimong luwas ug hapsay ang kinatibuk-ang kasaulugan.
Nagpahimangno nang daan ang nasampit nga opisyal nga gibawal gayud ang pagdala ug backpack sulod sa capitol grounds.
