Miabot na sa 14 ang namatay human sa 7.3-magnitude nga linog nga miigo sa Vanuatu kagahapon, Dec. 18.
Sumala sa lokal nga pulis sa Vanuatu, naglakip kini sa duha ka Intsik ug mga residente.
Gawas sa mga kaswalti, kapin sa 200 usab ka mga tawo ang gikataho nga naangol sa linog.
Hangtod karon nagpadayon pa ang rescue ug retrieval operations sa mga pasilidad nga nahugno diin pipila sa mga natanggong niini giingong padayon pa nga nakigkomunikar sa mga rescuers.
Gawas sa mga komersyal nga establisemento, daghang mga publikong edipisyo ang nahugno lakip ang mga embahada, ospital, simbahan, ug uban pa.
Ang pipila ka mga naluwas gibuhian usab gikan sa mga nahugno nga pasilidad.
Sumala sa National Disaster Management Office sa Vanuatu, dakong bahin sa kapital nga siyudad sa Port Villa ang nawad-an sa suplay sa kuryente, tubig, ug koneksyon sa internet human sa kusog nga linog.
Hangtod karon nagpadayon ang aftershock nga nasinati sa mga lungsoranon diin ang labing kusog mao ang Mag. 6.1 gibati sa kaulohan. Daghang mga nasud ang naghatag usab tabang sa Vanuatu.
Sa US, ang United States Agency for International Development nagpadala usab og team aron motabang sa rescue ug retrieval ops.
Ang ubang mga nasud sama sa Australia, France, China, ug bisan sa United Nations, mihatag usab sa ilang tagsa-tagsa ka pasalig nunot sa kusog nga linog.
