GENERAL SANTOS CITY – Nagpabiling balhog sa Malungon Municipal Police Station ang driver sa wing van nga responsable sa pag-daro sa duha ka motorsiklo sa Nat’l Highway Malungon Sarangani Province nga nagresulta sa pagkamatay sa 14 anyos og pagkaangol sa magtutudlo.
Ang driver sa wing van ang nailhan sa pangalan nga si Romeo Revilla Jr, 47 anyos nga taga Kiblawan, Davao del Sur.
Gibutyag ni Michael Mandong sa Bombo Radyo GenSan, dead on the spot ang biktima nga si Cesar Ludobise Jr, 14 yrs. old residente sa Brgy. Poblacion, Malungon og angol ang magtutudlo nga si Albert Ryan Tapitan nga nakaangkon og mga bun-og og garas sa lawas.
Sa pamahayag niini, nagsundanay ang motorsiklo sa mga biktima og parehong mihunong og nagpadaplin sa dalan pag-abot sa Nat’l Highway, Sitio Lower Biangan tungod adunay backhoe nga gatrabaho niadtong higayuna sa giayon nga tulay.
Apan sa kalit, gi-araro sa Isuzu Giga Aluminum wing van nga may plate number ZAN 8610 ang ilang mga motorsiklo hinungdan nga nalagpot ang 14-anyos og nakaangkon og mga samad sa lawas ang magtutudlo.
Tungod sa kakusog sa impact sa pagkalagpot, ‘wasak’ ang nawong sa 14 anyos nga halos dili na mailhan.
Magdepende ang kapulisan sa pamilya sa mga biktima kon magpasaka og kaso batok sa driver sa wing van.
