11 yr. old dalagita, gisulayan ug lugos sa sikad driver
GENERAL SANTOS CITY – Luwas na apan padayong nagpaalim sa balay-tambalanan ang 11 anyos nga dalagita human gisulayan ug lugos sa sikad driver.
Kahinduman nga namatay ang suspek nga giilang si Kudos Kuluhan, taga Sharif Aguak apan nagpuyo sa Prk Undok Gawan Brgy San Jose ning dakbayan, human gitabangan ug kulata sa mga residente, human nakasibat ang biktima.
Nasayran nga misulay pag sibat ang suspek sakay sa iyang sikad apan nahutdan ug gasolina hinungdan nga naabtan sa mga residente nga migukod kaniya ug gitabangan ug kulata.
Ug gani, mga barangay tanod na ang maoy nagdala kaniya sa balay-tambalanan apan nakabsan gihapon sa kinabuhi tungod sa grabeng head injury.
Samtang, base sa gihimong pagsuta sa biktima, migawas nga negatibong nahilabtan ang bata ug kasamtangan na lamang nagpaayo.
