Gideklara sa Bureau of Customs (BOC) ang subasta sa publiko sa 11 ka mga luhong sakyanan isip “failed bidding” human walay mga bidder nga mitungha alang sa gikatakdang pagbaligya.
Ang mga resulta gipahibalo sa BOC Auction Committee atol sa mga proseso nga gipahigayon sa Situation Room sa ground floor sa Office of the Commissioner building sa Port Area, Manila.
Sumala ni Atty. Jann Obillos, pangulo sa komite, ang Customs Administrative Order No. 03-2020 nag-ingon nga ang usa ka subasta kinahanglan ideklarar nga “failed bidding” kung walay mga bid nga nadawat.
Bisan pa niini, ang ahensya mopahigayon og laing subasta sa publiko alang sa nahisgutang mga sakyanan sa Abril 28.
Lakip sa mga sakyanan nga i-subasta mao ang Rolls-Royce Cullinan 2021, Bentley Continental 2021, Mercedes-Benz S680 Maybach 2023, BMW X6 2023, Jeep Wrangler 2021, Lexus ES 2019, Ferrari SF90 Stradale (Mansory) 2024, Rolls-Royce Phantom 2023, Mercedes-Benz G650 V12 BI Turbo 2022, BMW XM 2024 ug Lexus LX570 2018.
Target sa BOC nga makakuha og mga P200 milyon gikan sa pagbaligya sa mga mahalon nga sakyanan.
