GENERAL SANTOS CITY – Padayon pang giimbestigahan sa Traffic Management Unit ang pagbanggaanay sa duha ka motorsiklo sa Yumang St Corner Leon LIido St. San Isidro ning syudad kagahapon sa kaadlawon kon asa usa ang patay samtang tulo samaron.
Ang namatay ang nailhan sa pangalan nga si Ralph Barcelona, 40, taga Prk. Caseras Subd. 2nd Barrio, San Isidro. Samaron ang backrider niini nga si Ervie Garcia, taga Sta. Teresita Prk. Malakas.
Ang laing motorsiklo gimanehuan ni Rogelio Paglinawan, 24, taga Prk. Balakayo Brgy. Olympog ning syudad kon asa nakaangkon kini ug mga samad sa walang tiil, nawong, kilay og ang backrider niini nga si Jay Palma, 25, taga Conel ang samdan ang nawong.
Sa imbestigasyon sa kapulisan, nasuta nga ang duha ka single motor ang paingon sa Leon Llido St sa opposite direction apan pagliko ni Barcelona sa Yumang Street nakasugat ang motorsiklo nga maneho ni Paglinawan.
Ang kusog nga impact sa pagbangga ang hinungdan sa pag-angkon ug seryosong samad sa ulo ni Barcelona nga maoy hinungdan sa pagkamatay niini.
Pagkakaron nagpabiling na-impound sa TMU ang duha ka motorsiklo samtang ang mga samaron ang nagpabiling nagpaalim sa ospital.
