Tumong sa Philippine National Police (PNP), nga makab-ot ang zero crime atol sa umaabot nga Semana Santa pinaagi sa mas hugot nga koordinasyon sa mga opisyal sa barangay.
Matud ni PNP chief Gen. Jose Melencio Nartatez Jr. nga ang mga police commander gimandoan nga makigtambayayong sa mga barangay aron masiguro ang hingpit nga pagpatuman sa mga plano sa kalinaw ug kahusay.
Ang mga yunit sa Barangay magsilbi nga unang linya sa depensa aron mapalig-on ang presensya sa pulisya ug mas paspas nga moresponde sa mga insidente. Ang Semana Santa karong tuiga saulogon gikan sa Marso 29 hangtod Abril 5.
Karong Marso, gilunsad sa PNP ang kampanya nga “Ligtas SUMVAC 2026” gikan sa Marso 29 hangtod Mayo 31 aron mapanalipdan ang mga lungsuranon atol sa bakasyon sa ting-init.
Atol sa Semana Santa 2025, ang PNP nakatala og 64 ka pagkalumos, 15 ka sunog, 14 ka aksidente sa dalan, ug uban pang mga insidente sama sa mga buhat sa kalaw-ayan, alarm and scandal, pagpangawat, ug pagpanulis.
