Gipahayag ni Ukrainian President Volodymyr Zelensky nga kung ibaligya sa Estados Unidos ang 10% sa ilang “Patriot interceptor missiles”, mahimong mapukan sa Ukraine ang tanang “ballistic missiles” sa Russia.
Sa usa ka interbyu, giingon ni Zelensky nga nangayo siya karong tuiga sa ilang mga kauban sa US nga ibaligya kanila ang 5% sa mga missile nga anaa sa ilang weapon storage.
Matud niya, kung mabaligya kanila ang 5% sa interceptor missiles, makatabang kini aron malampasan nila ang tingtugnaw ug makaluwas og mga kinabuhi.
Apan kung maibaligya kanila ang 10%, matud ni Zelensky, ilang laglagon ang tanang ballistic missiles sa Russia.
Ang gipangayo ni Zelensky mao ang mga interceptor missiles alang sa Patriot air defense system, usa ka epektibong sistema sa depensa batok sa mga hulga gikan sa kahanginan. Gigamit kini aron mapukan o mapuslan ang mga bomba ug missile sa kaaway sa dili pa kini makaabot ug mahugno sa yuta.
Sa pagkakaron, 1% pa lamang sa kinatibuk-ang suplay sa maong mga interceptor missiles ang anaa sa Ukraine, hinungdan nga nagpadayon ang ilang kalisod sa pagdepensa batok sa mga pag-atake sa Russia.
