GENERAL SANTOS CITY – Lima ka bag-ong patrol vehicles ug ubay-ubay ka mga high-powered firearms nga may night vision ug finger scanner, ug mga bala, gi-turnover sa Police Regional Office 12, sa pagpanguna mismo sa bag-ong PNP director general nga si Gen. Oscar Albayalde, kagabii.
Kini human ang nahimong pagbisita ni Albayalde sa Koronadal City kagahapong adlawa, human ang nahitabong pagpamomba sa gawas sa usa ka simbahan kaniadtong Dominggo.
Alas-9:56 miabot sa PRO-12 headquarters sa Brgy Tambler ning dakbayan, si Gen. Albayalde, kung asa gilayon siyang nagpahigayon ug close-door meeting kauban ang mga PNP city ug provincial directors.
Gipasalig sa bag-ong PNP director general nga tanang probinsya ang makadawat ug susamang suplay sa mga ekipo, ug mga police patrol, kung asa inisyal matud pa kini, ug lauman nga may madugang pa, isip kabahin sa programa sa kasamtangang administrasyon.
Samtang, human sa maong aktibidad, gibisita ni Albayalde ang pulis nga napusilan sa natigayong buy-bust operation kaniadtong Dominggo, sa Brgy Labangal ning siyudad.
Apan una pa man makaabot ang PNP chief, nakabsan na sa kinabuhi si PO1 Butch Balatayo, sa St. Elizabeth Hospital.
Gumikan kini sa naangkon nga samad-pinusilan sa likod, kung asa milapos matud pa ang bala sa iyang dughan.
Kahinumduman nga nagpahigayon ug buybust operation ang mga sakop sa Pendatun Police station sa Labangal niadtong Dominggo dihang nahitabo ang ginukdanay sa suspek nga nagpangalan ug Malik Sadam Nuor ,26 nga taga Zone 1 Labangal.
Nakamtikod matud pa ang suspek nga pulis ang nakasabot sa pagbaligya ug druga hinungdan nga mipadagan sa iyang traysikel ug nangayu ug tabang sa lugar.
Nagsunod usab ang kapulisan sa suspek apan kalit nadunggan ang buto sa armas ug naigo si Balatayo.
Sa gipahigayong follow-up operation sa GSCPO, nadakpan ang nagpangalan ug Jasier Marlon Adat, 23, usa ka Criminology student nga taga Prk Maguindanao Labangal human nga gitudlo nga maoy nagpusil kay Po1 Balatayo.
Sa imbestigasyon, kaila matud pa niini ang unang nadakpan nga suspek nga si Noor. Giandam na ang kasong ipasang-at sa duha, kung asa kasong frustrated Murder kay Adat samtang RA 9165 kay Noor.
