Naningkamot karon ang World Health Organization (WHO) nga palig-unon ang kahimtang sa ilang panalapi human mobiya ang Estados Unidos, nga pinakadakong donor sa maong organisasyon.
Sa pagtapos sa tinuig nga World Health Assembly, gianunsyo sa WHO nga ang ilang budget para sa 2024–2025 mokabat og $6.8 billion, apan gilauman nga mosamot ang kakulang sa pondo pagsulod sa 2026–2027.
Bisan pa man nga giaprubahan na sa mga miyembrong nasud ang mas ubos nga budget ug bag-ong pagtaas sa membership fees, $1.7 billion pa gihapon ang kulang nga pondo para sa mga umaabot nga tuig.
Matod sa WHO, 60% sa ‘base budget’ para sa 2026–2027 ang nakumpirmang makuha na nila.
Apan kinahanglan pa nilang pun-an ang dako nga kakulangan sa ilang pondo.
Sa ilang paningkamot, mipasalig ang mga donor og dugang $210 million, lakip na ang $80 million gikan sa Switzerland, $57 million gikan sa Novo Nordisk Foundation, ug ubang mga donasyon.
Sumala sa WHO Director-General Tedros Adhanom Ghebreyesus, kritikal kini nga suporta sa panahon sa kalibutang krisis sa kahimsog, aron mapadayon nila ang ilang “life-saving work.”
Apan mas mikusog ang krisis sa panalapi sa WHO human pormal nga gisugdan ni US President Donald Trump ang proseso sa pag-withdraw sa Amerika sa organisasyon.
Wala na usab mibayad ang U.S. sa ilang membership fees para sa 2024 ug 2025.
Tungod sa grabeng kakulang sa pondo, napugos ang WHO sa pagpamubo sa ilang executive management team gikan sa 14 ngadto sa pito, ug gipagamay ang mga departamento gikan sa 76 paingon sa 34.
