Ipahigayon karong adlawa ang “White Friday” nga gipangulohan sa Notre Dame of Dadiangas University (NDDU), usa ka hilom nga lihok protesta nga nagtumong sa pagpakita sa panaghiusa ug pagsukol sa komunidad batok sa korapsyon.
Sa panawagan ni Bro. Manuel De Leon, FMS, presidente sa NDDU, iyang gidasig ang tanang estudyante, magtutudlo, kawani, alumni, ug bisan ang katawhan sa General Santos sa pag-apil ug pagtambong sa maong panagtapok.
Ang pagsul-ob og puti karong adlawa magsilbi nga simbolo sa kalimpyo ug panaghiusa.
Matod ni De Leon, timaan kini sa lig-ong baruganan sa NDDU batok sa korapsyon ug mga anomaliya nga nagguba sa katilingban.
Gipaabot nga modagsa ang mga henerals aron ipakita ang ilang suporta ug ipakita nga dili sila magpakahilom bisan pa sa sayop nga binuhatan.
Ang White Friday nagtumong nga mahimong malinawon nga plataporma aron ipaabot ang mensahe sa komunidad nga panahon na aron manawagan ang hustisya ug pagkamatinud-anon sa pagdumala.
