Nipagawas na usab ang whistleblower ug usa sa mga suspek sa kaso sa mga missing nga sabungero nga si Julie Patidongan alyas Totoy og laing rebelasyon.
Gibutyag ni alyas Totoy nga giingong gikidnap ug gipatay ang mga sabungero sa usa ka slaughterhouse duol sa fishpond sa Laurel, Batangas.
Diin matod niya pipila sa mga biktima nga nalambigit sa game fixing ug gilabay sa Taal Lake.
Una na usab nga gibutyag ni Patidongan nga pipila sa mga sabungero ang gihigtan og sandbags aron dili kini molutaw ug magpabilin sa ilawom sa linaw.
Dugang pa sa whistleblower nga ang sistema mao nga pagkidnap nila sa mga biktimang sabungero ug sa sunod adlaw kolektahon nila ang bayad nga tunga sa milyon ka pesos ug patyon nila ang tanan nga nalambigit sa game fixing, bata man o mabdos.
Matud pa usab ni alyas Totoy nga adunay pipila ka mga pulis ang giingong nalambigit sa kaso nga gustong mutingog ug andam makig-alayon sa mga otoridad.
Usa na niini ang gitawag nga “Vito” nga gihulagway ni alyas Totoy nga usa ka lieutenant colonel nga nagsilbing team leader.
Giswelduhan matod pa sila og P2 milyon matag bulan alang sa iyang tahas. Si Patidongan gikatakdang mosumite sa iyang opisyal nga affidavit karong Lunes kalabot sa nawala nga kaso sa mga sabungero.
